15/05/18

RECITANDO A TEIJEIRO

Como xa vos contamos, nos clubs de lectura de 5º e 6º estivemos lendo,  recitando e ilustrando poemas de Antonio García Teijeiro e agora queremos 
compartilos con vós. 

26/04/18

XUNTANZA DO CLUB DE LECTURA DE 5º DE PRIMARIA

Onte houbo renión do Diario do lector e nela falamos do libro Mondragó.La gran prueba, de Ana Galán: un libro moi divertido, con aventuras, intriga, emoción, fantasía, con momentos graciosos e dragóns marabillosos.
Recomendámosvos que o leades e, se vos gusta, podedes seguir a historia nos demais libros da saga.



Quedamos para a próxima!
Falaremos dos Megatoxos, de Anxo Fariña.

Felices lecturas!

23/03/18

XUNTANZA POÉTICA DOS CLUBS DE LECTURA

    Xa estamos en marzo, o mes da poesía, e este ano en Quintela dedicámosllo  a Antonio García Teijeiro, recente gañador do Premio Nacional de Literatura Infantil e Xuvenil co seu libro "Poemar o mar".
    Os clubs de lectura de 5º e 6º  tivemos unha xuntanza especial na que recitamos e ilustramos algúns dos seus poemas.Foi unha actividade moi bonita e, como nos soubo a pouco, decidimos que queremos compartila co resto do cole, pero... terá que ser á volta das vacacións!

    Aquí vos deixamos unhas fotos:







FELICES VACACIÓNS E FELICES LECTURAS!


21/02/18

XUNTANZA DO CLUB DE LECTURA DE 5º DE PRIMARIA

             Ola!
             Xa está aquí O diario do lector para falarvos do último libro que lemos,
No corazón do bosque, de Agustín Fernández Paz:un fermoso libro  que narra a relación entre unha nena coma nós e un trasno centenario, que nos fixo pasar uns momentos moi divertidos e outros algo tristes e reflexionar sobre a  amistade  e o valor dos amigos para superar os problemas. 

                             Ata pronto!

                           Felices lecturas!




15/12/17

XUNTANZA DO CLUB DE LECTURA DE 5º DE PRIMARIA

          Ola!
          Somos o club de lectura O diario do lector e onte tivemos a nosa primeira tertulia literaria, na que falamos do libro As bruxas, do célebre escritor galés Roald Dahl.
           Encantounos esta historia chea de emoción, misterio, algo de medo...e moito humor.E ese final feliz, pese a todo, (e moito mellor que o da película, por certo),cargado de ilusión e cunha mensaxe na que pensar:
            "Non importa quen es ou que semellas
                          se alguén te quere".
 Quen non o leu aínda, que o faga, que vale a pena.

                                Ata pronto!


21/09/17

CLUB DE LECTURA DE QUINTO

Empezamos un novo curso e estreamos club de lectura en quinto , "O diario do lector", con moitas ganas de ler e de compartir experiencias literarias.
Manterémosvos informados das nosas andainas.



                    FELIZ CURSO E FELICES LECTURAS!

29/05/17

DESPEDIDA DO CLUB DE LECTURA DE 6º

               Ola!

A nosa última lectura foi "La evolución de Calpurnia Tate", de Jackeline Kelly  e temos dúas opinións completamente distintas do libro:
mentres que a un grupo lle encantou , ó outro non lle gustou en absoluto.

Como xa sabedes, este é o último ano que estamos no colexio e, polo tanto, esta foi a última xuntanza do noso club "O mundo da lectura".
Gustounos moito esta experiencia, porque descubrimos libros que non coñeciamos e compartimos lecturas, risas, diversión e distintas opinións sobre os libros.
Esperamos que no instituto tamén haxa club de lectura para apuntarnos e recomendámosvos que , se vós tedes ocasión de participar nun, que o fagades, porque o ides pasar moi ben.

Queremos darlle as grazas a Mayca por acompañarnos e dedicarnos tanto tempo nas xuntanzas do club.

                                                  Abur!



 Non  vos esquezades de ler e de gozar coa lectura!

27/04/17

XUNTANZA ESPECIAL DOS CLUBS DE LECTURA DE 5º E 6º

Dentro das actividades do mes do libro, os clubs de lectura de 5º e 6º decidimos xuntarnos para falar sobre os nosos momentos e lugares preferidos para a lectura e fixemos un exercicio de creación colectiva de historias,no que saíron cousas curiosas e divertidas: unha forma máis de conmemorar o día do libro.







                         FELICES LECTURAS!!

04/04/17

NOVA XUNTANZA DO CLUB "O MUNDO DA LECTURA"

Ola!
Neste trimestre lemos "Esmeraldina, a pequena defunta", de Ledicia Costas.
O curso pasado lemos "Escarlatina, a cociñeira defunta"e recibimos a visita da autora; e como nos gustou tanto, quixemos ler o novo libro.
Á maioría de nós gustounos máis o primeiro, porque nos pareceu máis intrigante, aínda que este non está mal.O personaxe que máis nos gustou foi a avoa, A Tremenda.

E para a próxima tertulia  cambiamos de estilo e mergullámonos na lectura de "La evolución de Calpurnia Tate", de Jacqueline Kelly.

                                    Ata pronto!

20/01/17

Novo trimestre, nova lectura

Ola a todos e todas !
O club de lectura de 5º iniciamos unha nova lectura.
Como continuamos recordando a figura de Roald Dahl, este trimestre imos ler o libro "As Bruxas"
Esperamos pasalo igual de ben que co anterior, ademáis neste trimestre a familia medrou, pois se animaron dous compañeiros máis.
Un saúdo


20/12/16

CENTENARIO ROALD DAHL

  Con motivo da celebración do centenario do nacemento de Roald Dahl (1916 - 2016), nos clubs de lectura de 5º e 6º estivemos lendo libros do autor (" Charlie e a fábrica de chocolate" e "As bruxas") e mañá miraremos películas baseadas nas súas obras ("Matilda" e "Mi amigo el gigante").
  E como culminación da nosa homenaxe a este gran escritor hoxe elaboramos uns murais nos que recollemos parte da súa vida e da súa obra.Aquí vos deixamos unha foto e a nosa recomendación de que leades algún dos seus libros : veredes como vos gusta!




FELICES FESTAS E FELICES LECTURAS !


06/12/16

MANUAL PARA MUJERES DE LA LIMPIEZA. Lucia Berlin

A vida de calquera muller está chea de manuais, de normas, de obrigas, de responsabilidades e liberarse de todas elas, limpar e sacudir o po é unha tarefa realmente ardua e difícil.
A través deste conxunto de relatos Lucia Berlin, a autora, mergúllase nun xénero literario -a autoficción- no que se move á perfección. Coñecemos a súa biografía, dende a infancia ata a idade adulta, a través dos relatos onde ela mesma, agochada nun alter ego, é a protagonista ou cede o asento a personaxes que camiñan ao seu carón: o avó, a nai, os fillos, a curmá ou o simple cidadán que acotío pasa por diante.
Son relatos construídos dende a sinxeleza, sen grandes alardes narrativos e cuxo obxectivo é a descrición de situacións cotiás vividas ou percibidas pola propia protagonista. Ela non oculta a ningúen, e menos aínda ao lector, as súas miserias: relata a súa dependencia do alcol, das drogas e das relacións totalmente insubstanciais. Semella ser un imán para as fatalidades, mais asimilia e zigzaguea entre os problemas, conseguindo subir ata a superficie para volver comezar.
A protagonista vai percorrendo América de Sur a Norte, arrastrada pola súa propia familia, polas relacións persoais ou pola necesidade de atopar acougo nalgún lugar. O mesmo percorrido nómade que viviu de nena, vaino reflectir na súa familia e sempre co mesmo obxectivo: procurar o equilibrio entre a terra e a persoa.
As situacións insólitas, rocambolescas ou mesmo surrealistas son percibidas polo lector como intrínsecas á propia vida da protagonista: sendo ela, non podería suceder doutro xeito.
Chamaron a atención os finais dos relatos, non hai grande interese en pechar a historia, na maioría dos casos deixa o final aberto, e é o lector quen o interpreta ou simplemente pecha o libro e fica durante uns instantes dándolle voltas ao relato.
Destaca tamén na súa forma de narrar a enorme simbioxe entre o lugar, como espazo, e o contido que está a narrar. Delimita cun ritmo narrativo e cun léxico diferente os distintos lugares polos que pasa: non lemos igual un relato que lle sucede en Chile ou México, ca un relato situado en Nova York. En moitas ocasións o ritmo narrativo cambia dentro do propio relato: o antes e o despois da inxesta do alcol ou da viaxe ata a clínica clandestina onde ían practicarlle o aborto.
Lucia Berlin é unha artista da linguaxe, poucos escritores conseguen en poucas liñas transportarnos de cultura en cultura e de país en país sen caer no tedio de estar continuamente realizando un exercicio de agudeza lectora para non perder o fio argumental.
En definitiva, unha lectura que deixou pouso en cada un de nós e que nos levou a preguntarnos: e agora que leo?


Obrigadas pola nosa dependencia lectora seguimos con: Vestido de novia de Pierre Lemaitre

LA HIJA DE LA CRIADA. Barbara Mutch

Escoitando a música de Grieg caendo dende o alto dos cantís e saboreando o po amarelento da calor africana, é como Barbara Mutch nos introduce nunha historia situada na Sudáfrica do Apartheid.
O contraste brutal entre a vida dos brancos e dos negros vese diluída pola figura de Cathleen, irlandesa de nacemento, que casa cun banqueiro demasiado egocéntrico, para o cal a familia non era máis ca outro elemento ornamental dos moitos dos que facía alarde.
O súa muller é a guía a novela: representante dunha sensibilidade extrema e pouco crible. A súa historia representa o elo que une a brancos e negros: non dubida en dedicar parte do seu tempo na formación de Ada, filla da criada negra que teñen na casa. Cathleen, unha vez que se decata do seu fracaso, a morte do fillo, a rebeldía indomable da súa filla e a violación por parte do seu home de Ada, decide asumir a súa culpa e, nun intento de redimir os pecados, sae na búsqueda do perdón como medio de acougo para a súa conciencia.
Malia todo Barbara Mutch non conseguiu uns personaxes ben definidos, non foron capaces de camiñar sós ao longo das páxinas e nunca saíron do espazo limitado que lle impuña a escritora.
Hai na historia dous espazos, dous mundos totalmente separados e unidos á vez: o río separa e é o mesmo río o que une as vidas das dúas razas destinadas a entenderse porque se necesitan. Sobrevivir e aprender de ambos mundos é a tarefa que Ada desenvolve ao longo da novela.
A autora aproveitou un proceso histórico de enorme transcendencia para rematar coa segregación racial en Sudáfrica, pero non conseguiu espertar o interese do lector: unha lectura que gustou a uns máis ca a outros, pero na que todos coincidimos que ser a filla da criada é un lastre que aínda hoxe a raza negra non conseguiu desamarrar.


Próxima lectura: Manual para mujeres de la limpieza de Lucia Berlin.  

03/10/16

CLUB DE LECTURA DE 6º

Ola!
Somos "O mundo da lectura", o club de lectura de ...6º! (que este xa é o segundo curso no que decidimos xuntarnos para compartir o noso gusto polos libros).
      Empezamos con moitas ganas e cun libro que xa deixamos escollido no mes de xuño: "As bruxas", de Roald Dahl. Ímolo ler para comentar na vindeira tertulia (e animámosvos a facelo, porque parece moi interesante) e, como este ano é o centenario do autor, temos moitas propostas para homenaxealo, que xa vos iremos contando...
        Seguimos en contacto!



Felices lecturas!!!

13/07/16

LA AMIGA ESTUPENDA . Elena Ferrante.

La amiga estupenda é o primeiro volume dunha tetraloxía dedicada a estas dúas amigas napolitanas.
A cidade de Nápoles durante os anos 50 é o escenario elixido por Elena Ferrante para botar á vida a dúas raparigas: Lina e Lenù. As súas historias son as historias dunha sociedade onde sobrevivir é a única tarefa á que se encomendan.
A novela semella un cadro costumista que vai cobrando vida a medida que Lina e Lenù van pisando as rúas e participando dunha vida na que deben sobrevivir como heroínas.
Mergullámonos na vida das familias, comemos con elas e ata chegamos a comprender os seus movementos e os seus comportamentos: actúan empurradas polo afán de supervivencia, de seguir vivos e non sucumbir a esa riada de miseria.
O lector/a, levado da man de Lenú, a narradora, asiste a un verdadeiro espectáculo: os asasinatos, as estorsións, o poder do diñeiro, a política clandestina...
Neste primeiro volume, Elena Ferrante céntrase na infancia e adolescencia destas dúas mozas. Lina irá marcándolle o sendeiro a Lenú, un sendeiro que ela mesma non vai seguir porque antepón as necesidades da súa familia ás súas propias. A escola, a lingua, fronte ao dialecto que predomina entre as familias que viven nese barrio, convértense en marcas diferencias para Lenù: falar en italiano e ir á escola suporalle ser respectada e mesmo valorada. Xa dende as primeiras páxinas vemos un desexo de aferrarse á escola como medio para saír desta situación abafante e caótica na que están inmersas.
As diferenzas entre home e muller son evidentes: o home é o que trae o soldo á casa, a muller é unha posesión que debe estar ao seu servizo. A violencia forma parte da propia idiosincrasia do Nápoles dos anos 50, onde todo o coro de personaxes debe adaptarse a ese espazo no que lles tocou vivir.
En definitiva, unha novela que daría para horas e horas de tertulia e que a ningunha de nós deixou indiferente.


Temos deberes para o verán!! A próxima lectura: La hija de la criada de Barbara Mutch

PARA FACER UN COMENTARIO

-Pulsa co cursor enriba de "comentarios"

-Elixe de identidade "Nombre"e pon o teu nome na casilla

-Escribe no recadro o teu comentario

-Pulsa enriba de "Publicar comentario"

-Sairá publicado máis tarde,cando nos chegue

¡ESPERAMOS OS VOSOS COMENTARIOS!
As ilustración e imaxes que publicamos neste blog teñen un uso educativo. Si están suxeitas a dereitos de autor/a, facédenolo saber, para poder retiralas axiña.
Grazas